Ipinanganak noong taong 1911. Nagbibinata pa lang ay naniningalang-pugad na sa edad na labing-apat na taon. Kapag bumibisita siya sa bahay ng kanyang pinipintuho, nakapormal na suot amerikana. Pumapanhik ng ikaanim na hapon at bumababa ng ikawalo ng gabi. Nang sumapit ang dalawamput limang taon, nabihag niya ang puso ni Lourdes Religioso at nagpasiyang mag-isang dibdib.

         Nagpulot-gata sila sa Pines Hotel sa Lungsod ng Baguio. Matapos ang kanilang matamis na karanasan ay tumuloy sa sarili nilang tahanan sa Miserecordia ( sa may lugar ng Central Market).

        Bilang isang mahusay na inhenyero siya ay nakapagtrabaho sa Public Works sa Maynila. Makalipas ang ilang taon, siya ay binigyan ng trabaho bilang tagapamahala ng Public Works sa Legaspi, Albay sa Bicol. Nanirahan sila dito sa loob anim na taon. Habang sila ay namamalagi doon, isinilang ang ikaanim nilang supling na si Raul. Dahil sa kahusayan at katalinuhan niya bilang inhenyero, siya pinapag-aral ng pamahalaan sa Amerika para magpakadalubhasa sa agricultural engineering. Siya ang kauna-unahang tumungo sa Amerika sa pamilya Reynoso. Sa kanyang pagbalik buhat Amerika, siya ay naging  project engineer ng National Irrigation Administration. Nadestino sa ibat ibang bayan tulad ng San Jose Nueva Ecija, Gapan Nueva Ecija, at San Rafael, Bulacan na kung saan siya ang  namahala sa paggawa ng Angat Dam. Panahong ng Martial Law nagbitiw na siya sa kanyang trabaho sa pamahalaan. Ilang taon pa tumungo na siya sa Amerika upang doon manirahan.